نەوەی نوێ ھێرشێن تورکیایێ بۆ سەر مەخمور و شنگالێ شەرمزارکر
فۆتۆ: فۆتۆ: ئێن ئاڕ تى
2018-12-14
195 جار خوێندراوەتەوە
فراکسیۆنا نەوەی نوێ ل پەرلەمانێ کوردستانێ دژایەتیا خوە ل ھەمبەر بۆمبەبارانێن دوھی یێن بالافرێن شەریێن ئارتێشا تورکیایێ بۆ سەر مەخمور و شنگالێ نیشاندا.
د ڕاگەھاندنەکێ دا فراکسیۆنا نەوەی نوێ ل پەرلەمانێ کوردستانێ ڕاگەھاند، "فراکسیۆنا نەوەی نوێ ل پەرلەمانێ کوردستانێ، دژی ھەر دەستدڕێژیەکێینە بۆ سەر سەروەریا ولاتێ مە و بۆمبەبارانێن دوھی یێن ئارتێشا تورکیایێ بۆ سەر مەخمور و شنگالێ شەرمزار دکەین، کو جھێ داخێیە زیانێن جانی و ماددی لپەی بوون".
دیارکریە ژی، ئەو وەک فراکسیۆنا نەوەی نوێ، بەرپرسیارەتیا پاراستنا سەروەریا ھەرێم و بەغدایێ د ئێخنە ستۆیێ دامەزراوەیێن فەرمیێن حکومەتێن ھەرێما کوردستانێ و دەولەتا عێراقێ، کو چەندین جارە سەروەریا ولاتێ مە تێ بنپێکرن، و ھەردوو حکومەتێن ھەرێم و عێراقێ نەکارینە ب ڕێکێن یاسایی و دیپلۆماسی، چارەسەریەکا گۆنجایی بۆ ڤان دەستدرێژیان ببینن.
د داوییا ڕاگەھاندنا فراکسیۆنا نەوی نوێ دا هاتیە، زێدەباری نیشاندانا ھەڤخەمیێ بۆ کەسوکارێن قوربانیان و زیانپێگەھشتیان، ب ئەرکێ ھەردوو حکومەتێن ھەرێم و عێراقێ دزانیت نەھێلن جارەکا دن ئەڤ بۆیەرە دووبارە ببن و پێدڤیە زیانپێگەھشتیێن وێ بۆمبەبارانێ ژی بێن قەرەبووکرن، زێدەباری وێ یەکێ ژی مەندەھوشیا خوە نیشاندا لسەر نەبوونا ھەلۆیستان ژئالیێ حیزبێن کوردستانی ل ھەمبەر ڤان بنپێکاریان.
ئەڤە ژی دەمەکێ دایە، شەڤا بووری (١٣ێ کانونا ٢٠١٨ێ) بالافرێن شەری یێن ئارتێشا تورکیایێ، کەمپا مەخمورێ یا ئاوارەیێن باکورێ کوردستانێ و شنگال بۆمبەباران کرن و ل گۆری ئامارێن ھەری داویی، د ئەنجام دا ٤ ژن شەھید بوون کو سێ ژ وان ژ یەک مالباتێ نە و ھەژمارەک کەس ژی بریندار بوون.
س.م