فۆتۆ:
2021-06-28
90 جار خوێندراوەتەوە
نوینەرێ نەتەوەیێن هەڤگرتى بۆ هاریکاریا عێراقێ ڕاگەهاندیە، بۆ رێگرتن ژ وان بڕیارێن شاش، ئەنجامدانا چاکسازیێ ل وان سازیێن دادوەرى گەلەک پێدڤیە ل هەرێما کوردستانێ.
نوینەرێ نەتەوەیێن هەڤگرتى ل عێراقێ (یونامى) دەربارەى جێبەجێکرنا سزایێ شەش سال زیندانکرن ب سەر چالاکڤانێن بەهدینان دا د تویتەکى دا ڕاگەهاند، "جهێ داخێ یە بریارا دوهى یا دادگەها پێداچوونا هەولێرێ نیشاندەرا وێ ڕاستیێ یە کو ئەنجامدانا چاکسازیێ ل سازیان د سیستەمێ داوەرى دا گەلەکا پێدڤیە د هەرێما کوردستانا عێراقێ دا، بۆ رێگرتن ل ڤان جۆرە بریارێن شاش د داهاتى دا".
هەر دوهى ژى مارتن هوز بالیۆزێ ئێکەتیا ئەوروپا ل عێراقێ ڕاگەهاند، لێپرسینا نە ڕاست و نە ساخلەم ل هەمبەرى دەستەسەرکریێن بەهدینان کریە، گوت ژى، "مافێ رادەربین و دادگەها سەربەخۆ، ئێکن ژ شەنگستێن دیموکراتیەتێ".
دوهى، دادگەها پێداچوونا هەرێمێ بڕیار دا ب جێبەجێکرنا سزایێ شەش سال زیندانکرن بۆ دەستەسەرکریێن بەهدینان و ب ڤێ ژى تەڤایا تانان هاتنە رەتکرن کو ئاڕاستەیێن وێ دۆسەیێ ڤەکربوون.
ئەڤە ژی ددەمەکی دایە، زێدەتری حەفت مەهانە چەند رۆژنامەڤان و چالاکڤانێن سڤیل ل بادینان دەستبسەرکرینە، ل ١٦ی مەها سباتا ئەڤ سالە ژی دا ل دادگەها تاوانێن هەولێرێ دادگەهکرنا پێنج ژ وانا برێڤەچوو و تێدا لدیڤ هەردوو ماددەیێن ئێک یێن ژمارا ٢١ یا سالا ٢٠٠٣ێ ب بزاڤکرن بۆ تێکدانا ئاسایشا نەتەوەی سزایێ شەش سالێن زیندانکرنێ بسەر وان دا سەپاند.
ئەوێ بڕیارا دەربارەی دەستەسەرکریێن بەهدینان، نەرازیبوونا رێکخراوێن ناڤدەولەتی و بەشەک ژ پەرلەمانتاران لدیڤ خۆ ئینایە و وەلاتێن دەرڤەژی نەرازیبوون دەربارەی سەپاندنا سزایێ شەش سالێن زیندانکرنێ بسەر وان چالاکڤان دەربڕیە.
د.ش