فۆتۆ:
2021-06-27
496 جار خوێندراوەتەوە
بالیۆزێ یەکێتیا ئەورۆپا ل عێراقێ ڕاگەهاند، ئیجرائاتێن نەڕاست و نە ساخلەم لهەمبەر دەستەسەرکریێن بەهدینان هاتنەکرن، دبێژیت ژی، "مافێ ڕادەربڕین و دادگەهکرنا سەربەخۆ، ئێکە ژ مافێن سەرەکی یێن دیموکراتان".
مارتن هوز بالیۆزێ یەکێتیا ئەورۆپا ل عێراقێ دتویتەکێ دا ڕاگەهاند، "ئەو بڕیارا ئەڤرۆ ژ ئالیێ دادگەها هەولێرێ ڤە دەرکەتی و تەکەز لسەر وێیەکێ کری کو ئەو پێنج رۆژنامەڤان و چالاکڤانە شەش سالان بهێنە زیندانیکرن، کو ل مەها پێنج هاتبوونە دەستەسەرکرن، زێدەباری وان ئیجرائاتێن نەڕاست و نەساخلەم کو لهەمبەر وان هاتبوونەکرن ژ ئالیێ نەتەوەیێن هەڤگرتی ڤە ئاماژە پێ هاتیەکرن".
ئەو ژی هاتیە، "مافێ ڕادەربڕین و مافێ رۆژنامەڤانی و دادگەها سەربەخۆ؛ ئێکە ژ مافێن دەستپێکی یێن دیموکراتان".
ئەڤرۆ، دادگەها پێداچوونا هەرێمێ بڕیارا جێبەجێکرنا سزایێ شەش سالێن زیندانکرنێ بۆ سزادایین بەهدینان دەرخست و هەمی تانەیێن پارێزەران ل بڕیارێ داین ڕەتکرن.
پەسەندکرنا بڕیارا سزادانا بەشەک ژ رۆژنامەڤان و چالاکڤانین بەهدینان ژئالیێ دادگەها پێداچوونا هەریمێ ڤە؛ نەرازیبوونا رێکخراوێن ناڤدەولەتی و بەشەک ژ پەرلەمانتار و وەلاتێن دەرڤە و هێز و لایەن و پەرلەمانتارێن ناڤخۆ ژی لدیڤ خۆ ئینا.
ئەڤە ددەمەکی دایە، زێدەتری حەفت مەهانە چەند رۆژنامەڤان و چالاکڤانێن سڤیل ل بادینان دەستبسەرکرن، ل ١٦ی مەها سباتا ئەڤ سالە ژی دا ل دادگەها تاوانێن هەولێرێ دادگەهکرنا پێنج ژ وانا برێڤەچوو و تێدا لدیڤ هەردوو ماددەیێن ئێک ژمارا ٢١ یا سالا ٢٠٠٣ێ ب بزاڤکرن بۆ تێکدانا ئاسایشا نەتەوەی سزایێ شەش سالێن زیندانکرنێ بسەر وان دا سەپاند.
و.ح