فۆتۆ:
2021-06-26
662 جار خوێندراوەتەوە
بسەدەما کێمیا باران و دروستبوونا هشکەسالیێ روبارێ بەڕیشۆ ل گوندێ سەرگەلێ ل قەزا ئاکرێ هشکبوویە، وەلاتیەکێ وی گوندی ژی گوت، ب وێ سەدەمێ هزارەهان ماسی ژناڤچوون.
فەرەج وەلاتیەکێ گوندێ سەرگەلێ یە ل قەزا ئاکرێ بۆ ئێن ئاڕ تی ڕاگەهاند، بسەدەما هشکەسالی و کێمیا بارانان دئەڤ سالەدا روبارێ بەڕیشۆ ل وی گوندی هشکبوویە و ب وێ سەدەمێ ژی هزارەهان ماسی ژناڤچووینە و بەردەوام ژناڤدچن.
بەحسا وێیەکێ ژی کر، ئەڤە زێدەتری ١٠ رۆژانە ئەو روبارە هشکبوویە، خەلکێ گوندی ژی گەلەک ماسی ژ ناڤچوونێ رزگارکرن و بۆ بەنداڤا دینارتێ و گەلیێ زەنتا ڤەگۆهاستینە، لێ هەژمارەکا زۆر ژناڤچووینە. هەڤدەم گوت ژی، نها خۆدانێن حەودێن ماسیا هاتینە بۆ خۆ دبەن و دکەنە دناڤ حەودێن خۆ دا.
ئاماژە ب وێیەکێ ژی کر، بەنداڤ ل دینارتێ هەیە ئەو بتنێ سێ دەمژمێرا ئاڤێ بەرددەن ژبەر هندێ ناگەهیتە ڤی جهی ئەگەر ببنە هەشت تا نەهـ دەمژمێران وی دەمی ئاڤ دێ گەهیت و ماسی دێ ژ ناڤچوونێ رزگاربن.
ل داویێ ژی دبیژیت، هێڤیدارین حکومەت و ئالیێن پەیوەندیدار دهەوارێ بهێن و ئەو کارەساتا ل ڤێرێ روویدای ل ئالیێ خارتر رووینەدەت.
روبارێ بەڕیشۆ د گوندێ سەرگەلێ یا سەر ب قەزا ئاکرێ دا دەربازدبیت و ئەڤ سالە بسەدەما هشکەسالی و بێ بارانی و کێمیا بەردانا ئاڤێ ژ بەنداڤا دینارتێ هشکبوویە.
و.ح