فۆتۆ:
2021-06-23
138 جار خوێندراوەتەوە
ئەندامەکا پەرلەمانێ کوردستانێ ژ فراکسیۆنا نەوەى نوێ ڕاگەهاند، "پارتى و یەکێتى د نها دا وەک مافیا مەهانە ب سەدان ملیۆن دۆلارێن ڤی وەلاتى د دزن و موچەیێ موچەخۆران ژى ب رەوا نابینن".
مژدە مەحمود ئەنداما پەرلەمانێ کوردستانێ ژ فراکسیۆنا نەوەى نوێ د فەیسبۆکى دا بابەتەک بناڤێ "دەسهەلاتەکا چەتە" بەلاڤکریە و تێدا هاتیە، "ئاخر ئەگەر چەتە نەبن بتنێ ئەگەر داهاتێ پەتڕۆلێ نیڤەکێ ب دزن نیڤا دى دێ تێرا موچەى کەت، ئەرێ پا داهاتێ ناڤخۆ و دەرازینکێن سنورى و پارەیێ هەڤپەیمانان".
مژدە مەحمود ئاماژە ب وێیەکێ کریە، "ب وى هەمى داهاتى هەیا کو موچەیێ موچەخۆران نادەن، کو ٣٠ رۆژان ل هەمبەرى وی موچەى دەوامێ دکەن؟"
دیار ژى کر، "پارتى و یەکێتى د نها دا وەک مافیا مەهانە ب سەدان ملیۆن دۆلارێن ڤی وەلاتى د دزن و موچەی ژى ب موچەخۆران رەوا نابینن، چونکى ل گورى وان خەلک بێدەنگە و نائاخڤن".
وێ پەرلەمانتارا نەوەى نوێ ڕاگەهاند ژى، "پارتى و یەکێتى پشتڕاست بن بێ دەنگیا خەلکى بەردەوام نابیت و دێ کەڤن بەر شەقێن ڤى خەلکى و هەمى دزیێن وە دێ ژ گەوریا وە دەرهینن".
ئەڤە ژى د دەمەکى دایە، ٣٠ سال ب سەر دەسهەلاتداریا حکومەتا هەرێما کوردستانێ دەربازدبن، لێ هەیا نها هەمان ئاریشێن سالێن دەستپێکێ یێن دەسهەلاتا کوردى نە و چارەسەرنەکرینە، کو خۆ ژ دابینکرنا ئاڤێ، کارەب، خزمەتگوزاریێن دەستپێکى دبینیت و دەما چەند سالەکە ژى حکومەت بناڤێ لێبڕین و پاشکەفتى موچەیێ فەرمانبەران ب تەڤایی پارڤەناکەن، ڤێ یەکێ ژى نەرازیبوونا ئالیێن ئۆرپۆزیسیۆنێ و وەلاتیان زێدەتر کرینە.
چەندین جاران فڕاکسیۆنێن ئۆپۆزیسیۆنێ داخازکریە حکومەتا هەرێمێ بچیتە پەرلەمانێ کوردستانێ و زەلالکرنێ بدەت ل سەر وى داهاتێ ل بەر دەستێ وان، د دەمەکى دا نها داهاتێ دەرازینکێن سنورى زێدەبوویە و بهایێ پەتڕۆلێ و دۆلارى د بلندبوونێ دایە، لێ لێبڕینا موچەی بەردەوامە.
د.ش