فۆتۆ:
2021-06-23
107 جار خوێندراوەتەوە
بەرپرسێ فەرمانگەها پەیوەندیێن دەرڤەیا حکومەتا هەرێما کوردستانێ ڕاگەهاند، ئالۆزی دناڤبەرا پارتا کرێکارێن کوردستانێ (پەکەکێ) و پارتی دا نینە، بەلکو دناڤبەرا پەکەکێ و حکومەتا هەرێما کوردستانێ دایە.
سەفین دزەی بەرپرسێ فەرمانگەها پەیوەندیێن دەرڤەیا حکومەتا هەرێما کوردستانێ بۆ بی بی سی یا تورکی ڕاگەهاندیە،٣٠ سالە پەکەکە ل دەڤەرێن سنوری یێن هەرێما کوردستانێ جیگربوویە و خۆ ب جهگرا حکومەتا هەرێما کوردستانێ دزانیت.
گوتیە ژی، هێزێن پێشمەرگەی لژێر فەرمانا وەزارەتا پێشمەرگەی دانە، کو وەزارەتەکا حکومەتا هەرێما کوردستانێ یە، ژبەر وێیەکێ ئاریشە نە دناڤبەرا پەکەکێ و پارتی دایە، بەلکو دناڤبەرا پەکەکێ و حکومەتا هەرێما کورستانێ دایە، ئاماژە ب وێیەکی ژی کر، ئەو ئالۆزیە ل دەڤەرێن سنوری دروستبوویە، پەکەکە لێ بەرپرسە.
ئەڤە د دەمەکی دایە، ٥ی ڤێ مەهێ، وەزارەتا پێشمەرگەیێن هەرێما کوردستانێ ڕاگەهاندنەک بەلاڤکر و تێدا ئاماژە ب وێیەکی کریە، "بەرێ سپێدەهیا رۆژا شەمبیێ، ٥ی حوزەیرانا ٢٠٢١ێ هێزێن پێشمەرگەی، ژ ئالیێ هێزەکا (پەکەکێ)ڤە بۆسەیەک بۆ وان هاتبوو دانان، د ئەنجامدا پێنج پێشمەرگەی شەهیدبوون و حەفتێن دی ژی برینداربوون".
لگۆرەی ڕاگەهاندنێ، ئەو هیزا پێشمەرگەی بۆ مەرەما پاراستنا خەلک و گوندێن دەڤەرێ و ڤەگەراندنا ئاسایشێ بۆ دەڤەرێ لدەما ئەنجامدانا ئەرکەکێ سەربازی ل چیایێ مەتینا ل قەزا ئامێدیێ کەفتنە بۆسەیەکێ و پەیڤدارێ هەپەگە ژی دبێژیت، ئەو دەڤەرە نە جهێ ئاکنجیبوونێ نە.
هەڤدەم، میدیایێن پەکەکێ ژی ڕاگەهاندنەکا هەپەگێ بەلاڤکرن و تێدا هایداری دا پارتی و گوتبوو، "مە ئەو هێرشە ئەنجامنەدایە و نزانین چاوا روویدایە، داخازێ ژ وان هێزا دکەین کو ژ پشتڤە خەنجەرێ لمەنەدەن و خۆینا خۆشک و برایان نەرێژن، ژبەر وێیەکێ داخازێ ئاراستەی گەل و هێزان دکەین".
و.ح