فۆتۆ:
2021-06-22
103 جار خوێندراوەتەوە
وەزارەتا دەرڤەیا ئەمریکا د ڕاپورتەکا سالانە یا خۆ دا کو ل سەر رەوشا مافێن مرۆڤى ڕاگەهاند، ئازادیا ڕادەربینێ ل هەرێما کوردستانێ ل ژێر گەفێ دایە و دبێژیت ژى، یاسا رێکێ ب ئازادکرنا ب کەفالەت بۆ دەستەسەرکریان د دەت لێ ئاسایش رێکێ نادەت".
ئەڤرۆ سێشەمبى، وەزارەتا دەرڤەیا ئەمریکا ڕاپۆرتا سالانە یا خۆ بەلاڤکر و تێدا هاتیە، ئازادیا ڕادەربرینێ ل ژێر گەفێ دایە و "سەرکردەیێن بلندێن حکومەتا هەرێمێ ژ ئالیێ سیاسی ڤە کاریگەرى هەبوویە ل سەر کەیسێن هەستیار ل جڤاتا دادوەرى".
وەزارەتا ژ دەرڤەیا ئەمریکا د ڕاپۆرتا سالانەیا خۆ دا دیار ژى کر، هەرچەندە جڤاتا دادوەرى یا کوردستانێ ژ ئالیێ یاسایی، دارایی و کارگێرى ڤە سەربەخۆیە ژ وەزارەتا داد یا حکومەتا هەرێما کوردستانێ، لێ سەرکردەیێن بلندێن حکومەتا هەرێما کوردستانێ کاریگەرى هەبوویە لسەر کەیسێن هەستیار ژ ئالیێ سیاسى ڤە.
لگورى وێ ڕاپۆرتێ، د مەها ئابا سالا دەربازبووى دا رێکخراوا لێبوورینا ناڤدەولەتى د ڕاپۆرتەکا تایبەت دا ئاشکەراکر، کو "ئەندامێن چەکدارێن ئاسایشا حکومەتا هەرێما کوردستانێ چوونە سەر مالا ماموستا و چالاکڤان (بەدەل عەبدالقادر ابوبکر) ل باژێرێ دهۆکێ و بێ فەرمان دەستەسەرکرینە"، ئەو ژى هاتیە، "یاسا رێکێ د دەت ب ئازادکرنا ب کەفالەتا کەیسێ بۆ دەستەسەرکریان لێ ئاسایش رێکێ نادەت".
دەربارەى رەوشا زیندانیان ژى، وێ ڕاپۆرتێ دیار ژى کر، رەوشا زیندانیان ل هەرێما کوردستانێ د ئاستەکێ خراب دایە و زێدەبوونا هژمارا زیندانکریان زێدەترە ژ شیانێن دیار کرى ژ هەر شەش بنگەهێن چاکسازیان ل هەرێما کوردستانێ.
لگورى زانیاریێن وێ راپۆرتێ، هەرێما کوردستانێ ب ئاوایەکێ نە دروست و جێبەجێکرنا حوکمێن یاسایێن تاوانان پەیرەوکرینە، ل مەها ئابێ ژى دا هێزێن ئاسایشێ ٥٠ چالاکڤان و رۆژنامەڤانان دەستەسەرکرینە کو لگورى ئاخفتنا چاڤدێران ئەو دەستەسەرکرنە نە یاسایی بوو.
لگورى ڕاپۆرتا وەزارەتا دەرڤەیا ئەمریکا، ئەو رۆژنامەڤان و چالاکڤانەیێن ل هەێما کوردستانێ رەخنە ل دەسهەلاتێ گرتیە و بەشدارى خۆنیشاندانان کریە و رویبروى گەف و دەست درێژیێ بوویە و هندەک جاران ژى سانسورێن حکومەتێ بوونە سەدەما دەستێوەردانێ د کارێن ڕاگەهاندن و سنوردارکرنا گەهشتنا زانیاریێن گشتى.
د وێ ڕاپۆرتێ دا هاتیە، یاسایا رۆژنامەگەرى ل هەرێما کوردستانێ و عێراقێ رێک نەدایە ب داخستنا کەنالێن ڕاگەهاندنێ، لێ ل هەرێما کوردستانێ کەنالێن ئەهلى و یێن ئۆپۆزیسیۆنێ رویبروی داخستنێ بووینە.
دەربارەى ئازادیا رۆژنامەگەرى و میدیایی ژى، وێ ڕاپۆرتێ ئاماژە ب وێ یەکێ ژى کریە، یاسایا رۆژنامەگەرى ل هەرێما کوردستانێ دەسهەلات نەدایە حکومەتا هەێمێ بۆ داخستنا کەنالێن ڕاگەهاندنێ، لێ ل مەها ئابێ حکومەتا هەرێمێ ئۆفیسا رادیۆ و تەلەفزیۆنا (NRT) داخست ب سەدەما رومالا کەنالى بۆ خۆنیشاندانان.
ئەڤرۆ وەزارەتا دەرڤەیا ئەمریکا د ڕاپۆرتا سالانە یا خۆ دا تایبەت ب مافێن مرۆڤى راپۆرتا خۆ یا تایبەت ب رەوشا مافێن مرۆڤى ل عێراق و هەرێما کوردستانێ بەلاڤکر، ڕاپۆرت ب هەرسێ زمانێن کوردى، ئینگلیزى و عەرەبى و د چارچوڤێ ٥٩ لاپەران دا، تەڤایا بۆچوونێن حکومەتا ئەمریکا لسەر رەوشا مافێ مرۆڤى ل عێراق و هەرێمێ دیارکر.
د.ش