فۆتۆ:
2021-06-20
2062 جار خوێندراوەتەوە
جوتیار عادل پەیڤدارێ حکومەتا هەرێما کوردستانێ بۆ میدیایێن پارتی ڕاگەهاندیە، چاڤەڕێینە حکومەتا عێراقێ ٢٠٠ ملیار دیناران رەوانە بکەت و هەیا هویرکاریێن بەرچاڤان روهنببن، بکارن بڕیارا پێتڤی لسەر موچەی بدەن، دبێژیت ژی، "حکومەت دگەل وێ دایە موچەی ب تەمامی بدەت و مە بزاڤێن جددیی ژی داینە کو موچە ١٠٠% بێهتە پارڤەکرن".
جوتیار عادل ڕاگەهاند ژی، "ئەم نکارین بڕیارێ بدەین ڤێ مەهێ دێ چەوا موچە هێتە پارڤەکرن، هەیا هویرکاری و پێشهاتێن دارایێ بهێنە گۆتۆبێژکرن، پشتی وێیەکێ دێ جڤین دەربارەی وێیەکێ هێتە کرن و بڕیارا پێتڤی دێ لسەر هێتە دان".
ئەوژی دیارکریە، "پشتی هنارتنا کوژمێ پارەی ژ بەغدا، ب هەڤکاری دگەل وەزارەتا دارایی و ل گورەی داهاتێ بەردەست پارە دێ بۆ موچەی هێتە دابینکرن، کومەکا ئیلتیزاماتا لسەر ملێن حکومەتێ هەیە و ب تنێ موچە نینە، لێ هیڤی دکەین ددەمەکێ نێزیک دا ئاریشەیا موچەی بهێتە چاەرسەرکرن".
بەحسا وێیەکێ ژی کریە، د ٦ی ڤێ مەهێ دا سێیەم نڤیسین ئاراستەی چاڤدێریا حکومەتا عێراقێ کریە و ئەوان لژنە هنارتیە هەرێما کوردستانێ و رۆژا ٧ی مەهێ دەستبکار بوو و هویربینیێ ل داهاتێن نە پەتڕۆلی و دەرازینکان و چەند تیمێن هەڤبەش ل دیوانا چاڤدێریا هەرێمێ و عێراقێ هاتینە پێکئینان، دبێژیت ژی، "داهاتێن نە پەتڕۆلی یێن هەرێما کوردستانێ د دەستێ تیما هەڤبەش یا چاڤدێریا دارایی یا هەردوو ئالیان دانە".
رۆژا ١٥ ڤێ مەهێ، مەسرور بارزانی سەرۆکێ حکومەتا هەرێمێ ڕاگەهاند، دگەل بەغدا لهەڤهاتینە پشکا بودجێ هەرێمێ بڤەگەرینن.
١٥ ڤێ مەهێ، رێباز حەملان هاریکارێ سەرۆک وەزیرێن هەرێما کوردستانێ د تاوتویا ئێن ئاڕ تیدا ڕاگەهاند، "ئەگەر بەغدا پاران ژی بهنێریت نکارین بێژین ١٠٠% لێبڕینا موچەی دێ ب داوی هێت"، دبێژیت ژی، "ل گورەی داهاتێ لبەردەستێ مە و پارێ بەغدا دێ بڕیارێ لسەر موچەی دەین ب بێ لێڕین".
دەما زێدەتری دوو مەهانە بودجا عێراقێ هاتیە پەسەندکرن، پشکا هەرێمێ د بودجەیا عێراقێ دا ١٢.٦٧%ێ هاتیە دیارکرن لهەمبەری وێیەکێ، حکومەتا هەرێمێ ب ڕادەستکرنا ٢٥٠ هزار بەڕمیلێن پەتڕۆلا رۆژانە ب بهایێ سۆمۆ دگەل ڕادەستکرنا نیڤیا داهاتێ خالێن سنوری هاتیە پابەندکرن، لێ هەیا نها چ کۆژمێن پارەی ژ بەغدا بۆ هەرێمێ نەهاتیە.
هـ.ئـ