فۆتۆ:
2021-06-19
536 جار خوێندراوەتەوە
میدیایێن فەرمی یێن ئیرانێ، سەرکەفتنا ئیبراهیم رەئیسی ئێک ژ بەربژێرێن هەلبژارتنێن سەرۆکایەتیا وی وەلاتی و مسوگەرکرنا ٦٢%ێ یا دەنگان ڕاگەهاند و بڤێ ژی بویە هەشتەم سەرۆکێ وی وەلاتی.
میدیایێن فەرمی یێن ئیرانێ، ئیبراهیم رەئیسی دئەنجامێن جوداکرنا ٩٠%ێ یا دەنگان شیایە ١٧ ملیۆن و ٨٠٠ هزار دەنگان بدەستڤەبینیت و بڤێ ژی وەکی سەرۆکێ نویێ ئیرانێ هاتە هەلبژارتن و شیا دململانێیا دگەل سێ بەربژێرێن دی دا ببەتن.
دابەشبوونا ئیرانیان بسەر دەنگدان و دەنگ نەدانێ دا، سیمایەکێ نوی دایە هەلبژارتنێن ڤێ جاری یێن ئیرانێ، ڕابەرێ بلندێ ئیرانێ ژی داخازا بەژداریکرنێ ژ دەنگدەران کر و خەلکەکێ زۆر ژی ل تۆرێن جڤاکی و لسەر جاددەیا ئیرانێ ب کەمپینا دەنگ نادەین دنڤێسان و تۆرەی و نەرازیبوونا خۆ لسەر رەوشا وەلاتێ خۆ دیارکرن.
ئیبراهیم رەئیسی کی یە؟
سەید ئیبراهیم رەئیسی ساداتی ل ١٤ی تشرینا دووێ ل سالا ١٩٦٠ێ ل تاخێ نوغان ل باژاری مەشهەدا پایتەختێ هەرێما خۆراسان ژ داییکبوویە.
ل سالا ١٩٨٠ێ دەما ژیێ وی ٢٠ سالبوو وەکی سەرۆکێ نڤیسینگەها داخازکەرێ گشتیێ بژارێ کەرەج هاتە دامەزراندن، پشتی چەند مەهان وەکو داخازکەرێ گشتی هاتە دەستنیشانکرن، ل سالا ١٩٨٢ێ ژ ئالیێ قودوسی داخازکەرێ گشتیێ وی دەمیێ ئیرانێ ڤە وەکی داخازکەرێ گشتیێ هەمەدانێ هاتە دەستنیشانکرن، ل سالا ١٩٨٥ێ وەکی جیگرێ داخازکەرێ گشتیێ تەهرانێ دەستبکاربوو و پشترە ل سالا ١٩٩٠ێ ژ ئالیێ محەمەد یەزدی سەرۆکێ وی دەمیێ دەستهەلاتا دادوەری کربوو دادوەرێ گشتیێ تەهرانێ.
ل سالا ٢٠٠٤ێ تا ٢٠١٤ێ وەکی جیگرێ سەرۆکێ داخازکەرێ گشتیێ دەستهەلاتا دادوەری هاتە دامەزراندن، ل سالا ٢٠١٤ێ وەکی سەرۆکێ داخازکەرێ گشتیێ ئیرانێ دەست بکار دبیت کو ژ ئالیێ عەلی خامنەی ڕابەرێ شۆرەشا ئیرانێ ڤە هاتە دەستنیشانکرن.
ل سالا ٢٠١٨ێ بفەرمانا عەلی خامنەی ڕابەرێ شورەشا ئیرانێ وەکی سەرۆکێ دەستهەلاتا دادەریا ئیرانێ هاتە دەستنیشانکرن.
دنهادا و د هەلبژارتنێن سەرۆکایەتیا ئیرانێ دا کو ل رۆژا ١٨ی حوزەیرانا ئەڤ سالە برێڤەچوو شیا پتریا دەنگان و برێژا ٦٢%ێ بۆ خۆ مسۆگەر بکەتن و بڤێ ژی بوویە سەرۆکێ نوویێ ئیرانێ.
و.ح
