فۆتۆ:
2021-06-17
828 جار خوێندراوەتەوە
هێلینا ژیێ وێ ١٩ سال ل هەولێرێ کو ب رێکا ئۆنلاین حەبکێن زێدەکرنا گرانیا خۆ کری بوون ژیانا خۆ ژدەست دا، بابێ وێ ژى دبێژیت، بسەدەما وان حەبکان ژیانا خۆ ژدەست دا، هەڤدەم حکومەتێ ژى دانپێدان ب وێیەکێ کریە کو نەشێت کۆنترۆلا فرۆتنا دەرمانى ب ئۆنلاین بکەت.
هێلین ب هیڤیا وێیەکێ بوو کو ب رێکا بکارئینانا وان دەرمانان کو رۆژانە ل ڕۆپەل و ئەکاونتان ریکلام بۆ دهێتەکرن کو وێ لەشەکێ لگورى دلێ خۆ هەبیت، لێ بێ ئاگەهبوو ژ وێیەکێ کو ئەو دەرمان بۆ ئێکجار دبیتە سەدەمما ژیان ژدەست دانێ.
هێلین ئەحمەد ژیێ وێ ١٩ سال بوون خۆێندکارا قۆناغا دوویێ یا پەیمانگەها کۆمپیوتەرى بوویە
بابێ هێلینێ دبێژیت، " مە سۆنەر بۆ گرت و نۆژداران گوتى، ریخۆلێن وێ ب سەدەما ماددەیێن کیمیایی ئاریشە تێدا دروستبوویە و مە ژى ئەو حەبکە د ژوورا وێ دا دیتن"، دبێژیت ژى، "داخازێ دکەم دویڤچوون بهێتەکرن هەیا کو ئێدى جەرگێ چ کەسێن نە شەوتیت".
ئەو دەرمانە ل دەرمانخانان دهێتە فرۆتن و شەرتە ب کوالێتیا کۆنترۆلى دەرکەڤیت، دەربارەى وێیەکێ نۆژدارەکێ دەرمانسازى بۆ ئێن ئاڕ تى گوت، "هەر دەرمانەکێ ب ئۆنلاین بهێت فرۆتن ساخلەم نینە و قەدەغەیە، چۆنکى دێ بیتە چەند قۆناغ و رێکارەکان دا دەربازببیت ژ نوى بگەهیتە دەستێ وەلاتیان".
ژئالیێ خۆ ڤە ژى، ڕێڤەبەریا ساخلەمیا هەولێرێ ڕاگەهاند، تیمەکا پشکنینێ دویڤچوون و ڤەکولینێ ل سەدەما ژیان ژدەست دانا هێلینێ دکەن و دهەر حالەتەکى دا سەرپێچیکار دێ روویبرووی سزایێ یاسایی بن.
وەزارەتا ساخلەمیا هەرێمێ هەیا نها نەشیایە رێگریێ ل فرۆتنا دەرمانێن ئۆنلاین بکەت، چونکى وەکۆ ئاسو حەوێزى پەیڤدارێ وەزارەتا ساخلەمیێ دبێژیت، ئەگەر ئەو ڕۆپەل و ئەکاونتە جهێ وان دیار بیت، هوسا دێ توندترین رێکاران گرنە بەر، لێ وان ڕۆپەلان جهێ وان دیار نینە و نەنیاسن و ناهێتە زانین دێ دگەل کێ ڕێکاران گرنەبەر.
ژ خرابیا سیستەمێ ساخلەمیێ و دەرمانا ل هەرێما کوردستانێ وەلاتى قوربانیێن ئێکێ نە ژبەرکو گەلەک جاران بسەدەما نەشتەرگەریان و شاشیێن نۆژدارى و بکارئینانا دەرمانان ب شاشى ڤە وەلاتى ژیانا خۆ ژدەست ددەن.
ئومێد چۆمانى، هەولێر
د.ش