فۆتۆ:
2021-06-16
329 جار خوێندراوەتەوە
رێکخەرێ ڕاسپاردەیێن نیڤدەولەتی ل حکومەتا هەرێما کوردستانێ بەرسڤا رێکخراوا ئەمنستی دا و ڕاگەهاند، "نابیت رێکخراوا ئەمنستی پشتا خۆ ب هندەک داتا و زانیاریان گرێبدەن و پسیارێ ژ حکومەتێ نەکەت"، هەڤدەم گوتیەژی، "نابیت ئەز بێژمە خۆ رۆژنامەڤان و چەک ددەستێ مندابیت و بچم تۆندوتیژیێ بکەم".
دیندار زێباری رێکخەرێ ڕاسپاردەیێن نیڤدەولەتی ل حکومەتا هەرێما کودرستانێ دەربارەی بابەتەکێ رێکخراوا ئەمنستیی یا نیڤدەولەتی بۆ دەنگێ ئەمریکا دیاردکەت، "ئەو بابەتێن دناڤا وێ ڕاپۆرتێ دا هاتین نە تشتەکێ نووینە و ئەز نزانم بوچی لێبۆرینا جیهانی پشتی شەش مەهان جارەکا دی بەحسا وی بابەتی دکەت، جهێ داخێ یە ئەو بابەتە وەسا لێ هاتنە بەریا سالەکێ یان دوو سالان تشتەک روویدابیت بیست تا سهـ جاران دووبارە دکەن و گەلەک جاران رووداو چارەسەربوویە ئەوان زانیاری نینن کو چارەسەربوویە ژبەرکو ئەبدیت نینن هەر دبێژنە ڤە واتا بابەتی زێدەتر دکەنە سیاسی".
دبێژیت، "حکومەتێ پێنگاڤ زەلالکرنە و ئیجرائاتێن خۆ ژی هەبووینە، گرتنا وەلاتیەکێ یان خەلکەکێ ل هەرێما کوردستانێ ئەڤە نە بڕیارا حکومەتا هەرێمێ یان بەرپرسەکێ هەرێمێ یە، ئەڤە بڕیارەکە ئەگەر وی کەسی تاوان یان سەرپێچیکربیت دادگەهێن هەرێما کوردستانێ دکەڤانێ دەستوریدا کو بەشەکن ژ دەستهەلاتا دادوەری ئەو بڕیارا خۆ ددەن کا چ سزا لسەر بسەپینن".
دەربارەی خۆنیشاندانان ژی دیندار زێباری ئاماژە ب وێیەکێ دکەت، "مە ل هەرێما کوردستانێ یاسایا خۆنیشاندانان هەیە کو دبێژنێ خۆنیشاندانێن ئاشتیانە و مەدەنیانە لێ خرڤەبوونەک بهێتەکرن و تێدا بدەهان کارمەندێن ئەولەکاریێ و خەلکێ بێ تاوان و سڤیل بریندارببن و بهێنە کوشتن و بدەهان ئاڤاهیێن حکومی و نەحکومی بهێنە شەوتاندن و رێک بهێنە تێکدان و ژیانا خەلکی بکەڤیتە دمەترسیێ دا، ب پشتراسیڤە ئەرکێ دەزگەهێن ئەولەکاریێ پاراستنا ئەمن و ئاسایشا هەرێما کوردستانێ یە و نابیت ئەز بێژمە خۆ رۆژنامەڤان و چەک ددەستێ مندابیت و بچم تۆندوتیژیێ بکەم".
بەحسا وێیەکێ ژی دکەت، "ئەگەر ئەو رێکخراوا نیڤدەولەتی دبێژیت دادوەریا هەوە نەیا عادلە دڕاستیێ دا ئەو رێکخراوە دشێت سەرەدانا وێ دادگەهێ بکەت و دەرگەهـ ڤەکرینە".
دەربارەی دستەسەرکرنا ١٤ کەسان ل پارێزگەها دهۆکێ دبێژیت، "ڤێ یەکێ ئەسل و ئەساس نینە کەس ل هەموو کوردستانێ نەهاتیە دەستەسەرکرن کو بتنێ بەژداری خۆنیشاندانان کربیت، ئەو کەسێن هاتینە دەستەسەرکرن سەرپێچی یان تۆندۆتیژی یان کارەکێ وەسا کرنە کو سزایەکێ یاسای هەبیت و بێی فەرمانا دادوەری و ئیجرائاتا دادگەهێ کەس ل هەرێما کوردستانێ ناهێتە دەستەسەرکرن و ڤان توهمەتان ئەسل و ئەساس نینە".
دبەشەکێ دی دا زێباری دبێژیت، "نابیت ئەو رێکخراوە پشتا خۆ ب هندەک داتا و زانیاریان گرێبدەن و پسیارێ ژ حکومەتێ نەکەن کا ئەرێ ئەو داتا و زانیاریە دروستن یان نە ڕەنگە بدەهان کەس هاتبن چارەسەرکرن ژی و ئەمنستی هەر هایدار ژی نەبیت".
ئەڤە گوتنێن دیندار زێباری رێکخەرێ ڕاسپاردەیێن نیڤدەولەتی ل حکومەتا هەرێما کودرستانێ ددەمەکێ دانە، بەریا دوو رۆژان رێخراوا لێبۆرینا ناڤدەولەتی(ئەمنستی) دڕاپۆرتەکێ دا جڤاتا ئاسایشا هەرێما کوردستانێ و ئاژانسا پاراستنا هەرێمێ تۆهمەتبارکرن لسەر سەرکوترنا خۆنیشاندەران برێکا دەستەسەرکرن و دادگەهـ کرنەکا نەدادپەروەرانە.
و.ح