فۆتۆ:
2021-06-16
713 جار خوێندراوەتەوە
جێگرێ دووێ یێ سەرۆکێ پەرلەمانێ عێراقێ ڕاگەهاند، شایستێن داراییێن شەش مەهێن ئەڤ سالە دێ بۆ هەرێمێ هێنە هنارتن بۆ هەر مەهەکێ ٢٠٠ ملیار دینارن. دبێژت ژی، "ئەگەر ڤێ مەهێ هەمی لسەر ئێک نەهێت، دێ ب چەند قوناغان هێت".
بەشیر حەداد جێگرێ دووێ یێ سەرۆکێ پەرلەمانێ عێراقێ بۆ میدیایێن نێزیک ژ پارتی ڕاگەهاند، "پێشبینی دکەم هەیا داویا ڤێ مەهێ، شایستێن داراییێت شەش مەهێن دەربازبووی یێن هەرێما کوردستانێ کو بۆ هەر مەهەکێ ٢٠٠ ملیار دینارن بگەهنە هەرێمێ، ئەگەر هەمی لسەر ئێک نەهێت دێ ب چەند قۆناغان هێت".
ئاماژە ب وێیەکێ ژی کر، دەربارەی جێبەجێکرنا یاسایا بودجەی، هندەک ئالیان هێجەت دگرتن، بۆ هندێ یاسا نەهێتە جێبەجێکرن، پشتی هەرێمێ هەمی زانیاری پێشکێشکرین، دوهی مە دیدار دگەل سەرۆکێ دیوانا چاڤدێریا داراییا عێراقێ ئەنجامدا و گوتە مە دوو تیمێن مە ل هەولێرێ و سلێمانیێ نە ب هەڤکاری دگەل چاڤدێریا هەرێمێ مژویلی کارینە بۆ هویربینی و خۆ ژ کاران رازی بکەن.
بەشیر حەداد گوت ژی، ئەڤە بوویە سەدەمێ وێیەکێ بەغدا قەناعەتێ بینیت، کو هژمارە د راست و درستن.
بەحسا وێیەکێ ژیکر، ل دەستپێکا سالێ دێ کار ب بڕیارێ هێتە کرن پێتڤیە ترلیۆنەک و ٢٠٠ ملیون دینار ژ بەغدا بهێن و دیار نینە دێ کەنگی پارە گەهیت.
جێگرێ دووێ یێ سەرۆکێ پەرلەمانی دبێژیت ژی، ئەگەرەکێ ب هێز هەیە بەری بدوماهیک هاتنا ڤێ مەهێ ئەو کوژمێ پارەی بگەهیتە هەرێمێ.
خالد شوانی وەزیرێ هەرێمێ بۆ کاروبارێن دانوستاندنێ دگەل بەغدا کو ئەندامێ شاندێ دانوستانکارێن هەرێمێ یە ڕاگەهاند، پشتی بزاڤ و گۆتۆبێژێن تیما دانوستاندنکارێ هەرێمێ ل پێناڤ جێبەجێکرنا یاسایا بودجەی و هاڤێتنا پێنگاڤێن کریاری یێن حکومەتا هەرێمێ بۆ جێبەجێکرنا پابەندبوونان، جڤاتا وەزیرێن عێراقێ بڕیارادا مەهانە کۆژمێ ٢٠٠ ملیار دیناران بۆ هەرێما کوردستانێ بهنێریت.
شەڤا دەربازبووی، مەسرور بارزانی سەرۆکێ حکومەتا هەرێمێ ڕاگەهاند، دگەل بەغدا گەهشتنە لهەڤهاتنێ و دێ بەشێ بودجەیا هەرێمێ ڤەگەرینیت، گوتبووژی، "ئەڤە وەرچەرخانەکا گرنگە و پێکڤە بسەر رێگریێەکا دژواردا زالبووین".
دەما زێدەتری دوو مەهانە بودجەیێ عێراقێ هاتیە پەسەندکرن، پشکا هەرێمێ ژی د بوجەیا عێراقێ دا ب ١٢.٦٧% هاتیە دیارکرن، لهەمبەر وێیەکێ ژی حکومەتا هەرێمێ پابەندکریە لسەر ڕادەستکرنا ٢٥٠ هزار بەرمیلێن پەتڕۆلا رۆژانە ب بهایێ سۆمۆ دگەل ڕادەستکرنا نیڤا داهاتێ خالێن سنوری، لێ هەیا نها چ کۆژمێن پارەی ژ بەغدا نەگەهشتنە هەرێما کوردستانێ.
هـ.ئـ