فۆتۆ:
2021-06-15
1315 جار خوێندراوەتەوە
ئەندامەکێ لژنا داراییا پەرلەمانێ عێراقێ دبێژت، "وەزیرێ داراییا عێراقێ بۆ شاندێ هەرێمێ گوتیە، هندەک مەهان دڤێت هوین پارەی بۆ بەغدا بشینن"، دبێژیت ژی، "ڕەنگە بەریا هەلبژارتنان بەغدا هندەک پارەی بۆ هەرێمێ بشینیت".
هۆشیار عەبدولا ئەندامێ لژنا داراییا پەرلەمانێ عێراقێ د بەرنامەیا تاوتوێیا ئێن ئاڕ تی دا ڕاگەهاند، "وەزیرێ داراییا عێراقێ گوتیە شاندێ هەرێمێ ئەم دێ یاسایا خۆ یا بودجەی جێبەجێکەین، لێ هوین بتنێ داتایان دشینن چ داهاتەکێ ڕادەستناکەن"، دبێژیت ژی، "وەزیرێ داراییا عێراقێ بۆ شاندێ هەرێمێ گوتیە، هندەک مەهان دڤێت هوین پارەی بۆ بەغدا بشینن".
هۆشیار عەبدولا زەلالژیکریە، "هەرێم دزانیت لهەڤهاتن دبەرژەوەندیا وێ دا نینە لێ ژبەر وێیەکێ کو ئەو بخۆ پەتڕۆلێ بفرۆشیت لهەڤهاتن ئەنجامدا، ژبەرکو هەرێمێ دڤیا هەر چ بیت بکەتن بتنێ پەترۆلێ لدەف خۆ بهێلیت و ئەو بخۆ بفرۆشیت".
ڕاگەهاند ژی، "هەرێمێ دڤێت بۆ ڤەگەراندانا پارەیی ئێک بەرمیلا پەتڕۆلێ ب بهایێ سۆمۆ دوو بەرمیلێن پەتڕۆلێ بفرۆشیت".
بەحسا وێیەکێ ژی کر، "حکومەتا هەرێمێ پارە لبەر دەستە، لێ نادەتە مووچەیێ فەرمانبەران و ددزن و جڤاتا وەزیران ژی مافێ وێیەکێ نینە لێبڕینا مووچەیێ فەرمانبەران دا بکەت".
ئەڤە ژی ددەمەکی دایە، ل ٣١ی ئادارا ئەڤ سالە پرۆژەیاسایا بودجەیێ عێراقێ هاتە پەسەندکرن و تێدا پشکا هەرێمێ ب رێژا ١٢.٦٧%ێ پەسەندکر، لگۆرەی یاسایێ حکومەتا هەرێمێ هاتیە پابەندکرن رۆژانە ٢٥٠ هزار بەرمیلێن پەتڕۆلا خاڤ ڕادەستی کۆمپانیا سۆمۆ بکەت و ٥٠%ێ یا داهاتێ نەیێ پەتڕۆلێ و خالێن سنوری ڕادەستی حکومەتا فیدڕالی بکەتن.
ئەو ژی د دەمەکی دایە، بۆ دەما زێدەتری دوو مەهانە بودجەیێ عێراقێ هاتیە پەسەندکرن، لێ هەیا نها چ کۆژمێن پارەی ژ بەغدا نەهاتنە بۆ هەرێمێ.
پشکا هەرێمێ د بودجەییا عێراقێ دا ب ١٢.٦٧%ێ هاتیە دیارکرن، لهەمبەر وێیەکێ ژی، حکومەتا هەرێمێ هاتیە پابەندکرن لسەر ڕادەستکرنا ٢٥٠ هزار بەرمیلێن پەترۆلێ ب بهایێ سۆمۆ دگەل ڕادەستکرنا نیڤا داهاتێ خالێن سنوری.
مەها دەربازبووی، بسەدەما وێیەکێ پارتی و یەکێتی داهاتێن خۆ بتەمامی نەزفراند خەزینا حکومەتێ پارڤەکرنا مووچەی پاشکەفت و پەرلەمانتارێن وان ئێک و دوو لسەر نەزفراندنا داهاتی و درەنگ دابەشکرنا مووچەی تۆهمەتبارکرن.
و.ح