فۆتۆ:
2021-06-15
334 جار خوێندراوەتەوە
رۆژا ١٠ى مەهێ، نوینەرێ پەیەدێ ل هەرێمێ گوت، سێ ئەندامێن وان ل بالەفڕخانەیا هەولێرێ دەستەسەرکرنە، لێ ئەڤرۆ ڕێڤەبەرێ بالەفرخانەیا هەولێرێ ڕاگەهاند، دەستەسەرکرنا سێ ئەندامێن پەیەدێ "نە ڕاستە".
ئەحمەد هشیار رێڤەبەرێ بالەفڕخانەیا هەولێرێ بۆ ئێن ئاڕ تى ڕاگەهاند، "ل بالەفڕخانەیا هەولێرێ کەس نەهاتیە دەستەسەرکرن لسەر بیر و بووچوونێن سیاسى و ئەو ژى نە ڕاسیتە کو پەیەدە بەحسا گرتنا سێ ئەندامێن خۆ ل بالەفڕخانەیێ دکەت".
ئاماژە ب وێیەکێ کر، "ئەگەر ژى هەیە کو کەسەکێ ئارشە هەبیت دگەل پاسپۆرت یان ژى ئیقامە یان بەلگەیێن دى دا و ژبەر هندێ چەند دەمژمێران پاش ب کەڤیت و ئەگەر بەلگەیێن وى تەمام نەبن، ب وێ بالەفڕا خۆ بۆ وى جهێ وى دێ ڤەگەرینین، ئەگەر چ ئاریشە نەبن دێ هێتە هەرێما کوردستانێ".
ئەحمەد هشیار بەحسا وێ یەکێ ژى کر، "ئەم بالەفڕخانەینە و جهێ ب هزاران کەسانە، کو هاتن و چوونێ لێ دکەن و لسەر ناڤ چاڤێن کەسێ ژى نەنڤیسیە کا ژ کیژ حزبێ یە و سەر ب چ ئالیەکى ڤەیە، ئەم ژى بتنێ سەرەدەریێ دگەل بەلگەنامێن فەرمى دکەین و پێدڤیە پاسپۆرتێ ئاریشە نەبن، ژبەرکو ئەوێ بهێتە عێراقێ، نابیت پاسپۆرتا وى ژ شەش مەهان کێمتر مابیت و دەما وێ بسەرڤەبچیت".
هەر ل رۆژا ١٠ێ مەهێ، نورى ئەسعەد نوینەرێ پارتا یەکێتى دیموکراتى (پەیەدە) ل هەرێما کوردستانێ ڕاگەهاند، سێ بەرپرسێن وان کو ژ ئەورۆپا ڤەگەراینە هەرێمێ ل بالەفڕخانەیا ناڤدەولەتیا هەولێرێ ژ ئالیێ هێزەکێ ڤە هاتینە دەستەسەرکرن.
دهەمان رۆژ دا، وەزارەتا ناڤخۆیا هەرێمێ ڕاگەهاند، "پەکەکێ ب هەڤکاریا دەستەکێ ناڤخۆیی چەندین وەلاتیێن خۆدان ڕەگەزناما ئەورۆپى لژێر ناڤێ گرۆپێ ئاشتى و ئازادىێ شاندینە هەرێمێ ب مەرەما تێکدانا سەقامگیریێ".
ئەڤە ددەمەکى دایە، تورکیا دەست ب هێڕشێن خۆ کریە ل هەرێما کوردستانێ، ب وێ سەدەمێ چەندین کەس هاتینە کوشتن و بریندارکرن و زیان ب چەندین وەلاتیێن دەڤەرێن سنورى کەفتیە.
لگورەى وەزارەتا پێشمەرگەی، رۆژا ٥ێ ڤێ مەهێ ل سنورێ چیایێ مەتینا پەکەکێ هێرشکریە سەر ژمارەیەکا پێشمەرگەی و ب وێ سەدەمێ پێنج پێشمەرگە شەهیدبوون و حەفتێن دی ژى برینداربوون.
هەشتى ڤێ مەهێ، وەزارەتا پێشمەرگەی گۆت ژى ل ناحیا دەرکارێ سەر ب قەزا زاخۆ ب چەکێ قەناس پێشمەرگەیەک هاتە شەهیدکرن و پەکەکە ژى ئەنجامدەرێ وێ هێرشێ یە.
لێ چەند بەرپرسەکێن پەکەکێ ئەو چەندە رەت کریە و بێ ئاگەهیا خۆ ل هەردوو بوویەران ڕاگەهاند و بەحسا وێیەکێ کر، ئەو بتنێ دگەل حکومەتا تورکیا شەرى دکەن.
ئومێد چۆمانى، هەولێر
د.ش