فۆتۆ:
2021-06-15
1765 جار خوێندراوەتەوە
لیوا یەحیا رەسول پەیڤدارێ هێزێن چەکداریێن عێراقێ ڕاگەهاند، حکومەتا فیدڕالی ڤەلڤینێن دبلۆماسی دەستپێکرینە لسەر وان بن پێکاریێن تورکیا دناڤ ئاخا عێراقێ دا ئەنجام ددەت.
لیوا یەحیا رەسول د لێدوانەکا فەرمی دا ڕاگەهاند، ڤەلڤینا دبلۆماسی ژ ئالیێ وەزارەتا دەرڤە یا عێراقێ دەستپێکریە دەربارەی دەسترێژیێن دووبارە یێن تورکیا دناڤ ئاخا عێراقێ دا کو پێتڤیە تەڤایا وەلاتان رێزێ ل سەروەریا وێ ئاخێ بگرن.
پەیڤدارێ سەربازیێ هێزێن چەکداری ل عێراقێ گوت ژی، دەستورێ عێراقێ بەحس ل بها و رێزگرتن و سەروەریا وەلاتێن دی دکەت و پێتڤیە ب هەمان شێوە وەلاتێن دیژی رێزێ ل سەروەریا ئاخا عێراقێ بگرن.
لیوا یەحیا رەسول دیارکر، ئەم رەتدکەین ئاخا عێراقێ ببیتە گۆڕەپانەک بۆ هێرشکرنا سەر وەلاتێن جیران، پێتڤیە تورکیا سەروەریا عێراقێ بێخیتە پێش چاڤێن خۆ.
ل ١٥ی مەها دەربازبووی، ب هێجەتا هەبوونا پەکەکێ ئاڕتێشا تورکیا هێرشێن خۆ بۆسەر هەردوو ناحیێن باتیفا و دەرکارێ ل سنورێ قەزا زاخۆ دەستپێکرن و بسەدەما وان هێرشان، زیانێن مەزن ب رەز و باغێن وەلاتیان کەفتیە.
وان هێرشان نەڕازیبوونێن وەلاتیان و ئالیێن حکومەتا هەرێمێ و عێراقێ دیڤخۆدا ئینان و داخازا راوەستاندنا هێرش و لەشکەرکێشیان بۆ سەر ئاخا عێراقێ کر.
م.م