فۆتۆ:
2021-06-15
879 جار خوێندراوەتەوە
شێورمەندێ سەرۆکێ هەرێما کوردستانێ بۆ کاروبارێن سەربازی ڕاگەهاندیە، چارەسەریا ئاریشەیان دگەل پەکەکێ گەلەکا ب زەحمەتە، ژبەرکو خۆ د سەپینن و خۆ دکەنە خۆدانێن هەمی جهەکی، دبێژیت ژی، "پەکەکە گۆتۆبێژان نزانیت، دێ هەر مینن ئەگەر شەڕ نەبیت".
بابەکر زێباری شێورمەندێ سەرۆکێ هەرێما کوردستانێ بۆ کاروبارێن سەربازی بۆ رۆپەلا فەرمی یا پارتی دیموکراتی کوردستانێ ڕاگەهاندیە، "حکومەتا هەرێمێ دگەل حکومەتا عێراقێ دەربارەی دەڤەرێن سنوری لسەر هێلێ نە، بڕیارە عێراق هێزێن پاسەوانی یێن سنوری زێدە بکەت و پێتڤیێن زێدەتر یێن چەکی زێدەتر بۆ دابین بکەت، بۆ وێیەکێ بکارن دەڤەرێن سنوری کۆنتڕۆل بکەن".
بەحسا وێیەکی ژی کر، ئەو رەنگێ هزرکرنا پەکەکێ "گەلەکا ب زەحمەتە" دگەل وان بکارین گۆتۆبێژان بکەین بۆ چارەسەرکرنا ئاریشەیان، ژبەرکو نە بتنێ دەڤەران داگیر دکەن، هەیا کو رێکێ ژی ل خەلکێ هەرێما کوردستانێ ژی دگرن بچنە سەر دەڤەرێن خۆ.
ئەوژی دیارکر، دوو لیوایێن پاسەوانی ل سنوری هەنە، سەر ب عێراقێ ڤەنە و هژمارەیا وان کێمە، ژبەر وێیەکێ حکومەتا هەرێمێ لسەر هێلێیە دگەل بەغدا و سوزا زێدەکرنا هێزێن خۆ دایە بۆ پاسەوانیا سنوری.
زێباری گوت ژی، "پەکەکە کومەکا ئەجێندایێن دەرەکی جێبەجێ دکەت و ئەو چەکێ ب کرێگرتینە، ژبەر وێیەکێ ئەو دێ هەر مینن ئەگەر ب شەڕ نەبیت، کو ئەوژی د بەرژەوەندیا چ کەسەکیدا نینە، لێ ب مخابنی ڤە ئەزمانێ گۆتۆبێژان نزانن".
دبێژیت ژی، "پەکەکێ ل باکوری چ نەکریە، هەیا ل ڤێرێ بکاریت تشتەکی بکەت، ژبەر وێیەکێ ئەو بۆ خەباتێ نەهاتینە تنێ بۆ تێکدانا رەوشا هەرێما کوردستانێ هاتینە".
ئەڤە ددەمەکیدایە، ل ٦ ڤێ مەهێ وەزارەتا پێشمەرگەیێن هەرێما کوردستانێ ڕاگەهاندنەک بەلاڤکر و تێدا ئاماژە ب وێیەکێ ژیکر، "بەرێ سپێدا رۆژا شەمبیێ ٥ی هەزیرانا ٢٠٢١ێ هێزێن پێشمەرگەی ژ ئالیێ هێزێن (پەکەکێ)ڤە بوسەیەک بۆ وان هاتبوو دانان، د ئەنجامدا پێنج پێشمەرگە شەهیدبوون و حەفتێن دی ژی بریندرابوون".
لگۆەی ڕاگەهاندنێ، ئەو هێزا پێشمەرگەی ب مەرەما پاراستنا خەلک و گوندێ دەڤەرێ و ڤەگەراندنا ئاسایشێ بۆ دەڤەرێ ل دەما ئەنجامدانا ئەرکێ خۆیێ سەربازیدا ل چیایێ مەتینا ل قەزا ئامێدیێ کەفتنە بوسەیەکێ و پەیڤدارێ هەپەگێ ژی دبێژیت، ئەو دەڤەرە نە جهێ ئاکنجیبوونێ بوو.
هەڤدەم، میدیایێن پەکەکێ ڕاگەهاندنەکا هەپەگێ بەلاڤکرن و تێدا هایداریێ ددەتە پارتی و دبێژیت، "ئەو هێرشە مە ئەنجام نەدایە و نزانین چاوا روویدایە، داخازێ ل وان هێزان دکەین کو ل ژ پشتڤە خەنجەرێ لمە نەدەن و خوینا خۆشک وبرا نەرێژن، ژبەر وێیەکێ داخازێ ئاراستەی گەل و هێزان دکەین".
بەریا نها میدیایێن پەکەکێ بەلاڤکربوون، "پارتی دیموکراتی کوردستان ل دەمژمێر ٤:٠٠ی بەرێ سپێدا هەمان رۆژ هێزەکا زۆرا سەربازیی بەرەڤ دەڤەرێن گەریلا ل ئامێدیێ و چیایێ مەتینا لڤاندن".
هـ.ئـ